Ol lombard al dì d'incœ

Scriver Lombard l'è una part importanta d'un projet de revitalizazion lenguistega per la lengua lombarda. Come ogni lengua "dialetizada", overa discriminada, sbiotida de la so storia soçolenguistega, e per donzene d'agn segregada a lengua principalment parlada, el lombard al g'ha miga de sistema ortografeg standard. El milanes classeg, forsi l'uneg sistema lombard con una certa tradizion storega, al se presta minga a tute i variant lombarde, e al g'ha el desvantaj de vesser stait desvilupad in subordinazion al sistema toscan e donca l'è minga rispetos de la morfo-fonolojia idiosincratega dei variant lombarde. L'è per 'sti motiv qì qe l'è nassud el projet scriver lombard.

scriver lombard

El sistema de Scriver Lombard l'inxubiss un'ortografia nœva qe:

  • la serviss de scriver de manera parzialment uniforma tuts i dialets lombards
  • l'è compagna dei ortografie dei lengue de normazion recenta: ocitan, catalan, galles, ladin
  • l'è inradixada indela tradizion leteraria lombarda plussee antiga, çoè medieval: Belcalcer, Bonvexin, Uguçon etc.
Grazia a qell'ortografia qì, vun qe al parla un qualsessia dialet lombard al podaria scriver un test
  • comunegativament important
  • de interess soraprovinçal
  • comprensibel per tuts i olter lombardofon
  • senza dover pensar ind un dialet qe al sia minga el so
  • senza sconder del tut l'identitaa del so dialet ind el scrit.
Tal ortografia l'inzigaria ogni lombardofon a l'utilizazion oral e scrivuda del so dialet ben plussee de quell qe pœden far i ortografie drovade incœ. Fondand i so cerne ind la leteradura academega speçalistega in revitalizazion lenguistega, l'autor al presenta la so proposta ortografega comè vun dei pass necessari per la revitalizazion del lombard, qe la g'ha comè obietiv concret quell de restabilir la trasmission interjenerazional de la lengua e qe la preved necessariament un increment de la fonzionalitaa soçal del lombard oral e scrivud.